Altes Rathaus - Überblick -

– ein Gedicht von Doris Müller, Breuningsweiler ©

 

 

Das Mundartgedicht beschreibt die knitzen Beobachtungen in der Sommerzeit anno 2023.

Dabei geht es um die tolle Modernisierung der Dorfstube, die frische Farbe der Außenfassade und das energiegewinnende neu gedeckte Dach unseres Alten Rathauses.

 

 

 

 

Altes Rathaus  -Überblick-

 

S'alde Rodhaus isch d'r Middelpunkt em Flegga,

ond mer wollt's aus em Dornröschenschlof wegga.

 

-Aber-

a bar Sacha von frier.

send mir

en meim Kopf hangablieba,

dia hann i uffgschrieba.

 

Von d'r erschda bis zur achda Glass,

hann i do henna mei Kendheid vollbracht.

Trotz ällem denk i, hanne s'Beschde draus gmacht.

 

Als Kend war's gröschde Gligg,

zom ziega an dem Gloggaschdriggg.

 

Midderberadung isch au gwea,

do wared dia Bäbila s'leichd

oder au d'schwer.

 

En Nähkurs für dia moderna Frau,

mit Schdich für Schdich

-jo ganz genau-

 

Hod mer Serena g'hörd vom Dach

wared älle schnell wach.

Feierwehr riggt aus,

und am End hangd am Giebel en nasser Schlauch.

 

Doch jetzt hoist's

-aus dia Maus-

www.Bürgerhaus-Altes-Rathaus.de,

ond graus isch die Idee.

 

Erschd mol hot mer entressierte gsuacht,

ond nadierlich glei vorbuachd.

wer mitmacht , ond dritt au glei ei

en dean Verei.

 

A bar Sacha send no rieberkomma,

dia hot mer übernomma.

 

Fleggafraua hend sich enteressiert,

ond sich mit en da Obstbauverai integriert.

Weil die clever send,

hend se sich denkt,

mer drifft sich oa mol em Monad no,

dass mer Kaffe drenga ond Kuacha

essa ko.

 

Ond a baar andere Fraua hen sich au zum Schrigga droffa,

dia send ganz offa.

deand Idea ond Mischderla ausdauscha

ond lassed dia Nodla laufa.

 

No a baar Sacha

-deand se do henna macha-

Gaiggla ond Frühaschobbe.

aber i glaub i muas me jetzt schdobba.

 

Denn, des alde Deng sod mer renoviera.

s'deand sich viele aranschiera.

Was do älles gmachd werda soll

-älle Termine send voll-

 

Ond jetzt gugge nomm, gugge romm,

lauder fleissige Leid om mi romm.

Se hend's gschafft,

händ ihr Ärbet vollbracht.

 

Drom heba mer's Glas

-ond wissed'r was-

a Lob an älle Mädla ond Buaba,

fier onser "Neia Dorfschduba"

•